ياللى انتَ إيه
ياللى انت عامل فيها تقيل
«إمتى الزمان يسمح يا جميل»
ألاقى نفسى ف وقت قليل
عايش معاك عيشه هنيَّه
ياللى انت عامل فيها زعلان
وتقول لى إيه أصل انا تعبان
حرام عليكى ده انا غلبان
ارحم دموع ساكنه عينيّا
ياللى انت عامل فيها ناسى
آه منك انت .. آه يا قاسى
مين ييجى هنا عندى يواسى
يقول سماح إنت وهىَّ
خلاص كفايه زعيق وخناق
خلاص كفايه زعل وفراق
أنا برضه واحد عنده إباء
ما تعمليش كده بقى فيَّا
أنا عايز اكون شخص مثالى
وقدوه للطلبه عيالى
والاقيكى بُكرَه جايَّه لى
بالابتسامه الورديَّه
تقولى لى آخر مره بجد
ولا حد فينا يزعّل حد
وإيدينا بالسلامات تتمد
ونعيش سعاده أبديَّه
أحمد عادل عيَّاد
مدينة نصر – القاهرة
الأحد، 15 مايو 2011
الساعة 2.30 صباحًا
___________
البيت «إمتى
الزمان يسمح يا جميل» من
أغنية «إمتى الزمان» لعبد الوهاب
ليست هناك تعليقات:
إرسال تعليق