حَـدُّوتِـة بـنـت وولَـد
العَجْز
طَلَّع مُعجزات
العَجْز طَلَّع مُحبَطين
طول عُمرى عاشق للبنات
والعِشق سابنا مجروحين
حدّوته عن بنت وولد
كان نفسهم يبنوا البلد
كان حُبُّهم هوَّ الوَتَد
كان حلمُهُم حلم السنين
شَقَّه وتكون مش ضيَّقه
واحنا ما نِقدَر ع الشَّقَى
عصافير تِحبّ الزقزقه
والطـيّـبات للطيّبين
نصرُخ نقول يا أهلنا
يرضيكوا يفشل حلمنا
مش كُنتوا برضُه زيِّنا
والاّ اتولدتوا مرتاحين
الفقر دايس حلمهم
والقهر دابح قلبهم
الحُب زاد مِن عزمهم
صحيوا لقوهم ميّتين
عصفوره ماتت ع الشجر
عصفوره أجمل م القمر
إنسانه فوق وصف البشر
عصفورها مات إنسان حزين
كان نِفسُه يسعِد قلبها
كان حلمُه يسعَد جنبها
كان لَمَّا يسمع حِسَّها
ينشِد كلام العاشِقين
كانت بتعشق بسمته
كانت تسانده ف محنته
كام مرَّه مسحت دمعته
والحزن بصمه ع الجبين
ماتوا كده وفارقوا الحياه
والحُبّ مكتوب ع الجباه
واللى سأل ع الحُبّ تاه
خلِّيك بعيد .. خلِّيك رزين
العَجْز طَلَّع مُعجزات
العَجْز طَلَّع مُحبَطين
طول عُمرى خايف م الحاجات
اللى تسيبنا مكسورين
«مفروض ماحدّش يفترى
ويبيع كأنه بيشترى
العُمر خد بعضه وجرِى»*
أنا كُنت واحد .. أصلُه طين
أحمد عادل عيَّاد
مدينة نصر – القاهرة
التلات، 12 إبريل 2011
الساعه 1.30 الصبح
* من قصيدة «خيال
النور» للشاعر فؤاد
حدَّاد
ليست هناك تعليقات:
إرسال تعليق