الثلاثاء، 14 يوليو 2015

خرِّيج آداب إنجليزي

خرِّيج آداب إنجليزي

جاءتني فكرة هذه الخواطر منذ عام. وكان سببها استيائي من تفكير طالبتين لديّ، سمر سيد وميرنا عمرو، بخصوص كلية الآداب، قسم اللغة الإنجليزية تحديدًا. وبسببهما أردت كتابة هذه الخواطر، واحتفظتُ بالفكرة في رأسي لمدة عام، كي أكتبها وأنشرها بالتوازي مع إعلان نتايج امتحانات الثانوية العامة واستعداد جميع الطلاب لتقديم أوراقهم لدخول الجامعات. وسأكتب معظم الكلام بالفصحى مع بعض العامية، أو بالعامية مع بعض الفصحى، وذلك تسهيلًا على الجميع، أو حسب ما يتأتَّى الكلام لي. وسأناقش هذه النقاط:
ü   اختيار أنسب كلية
ü   عن كلية الآداب
ü   خريج آداب إنجليزي
ربما يقول القارئ إنه من الأفضل تقسيم هذه الخواطر إلى ثلاث مقالات، كي تصبح أقصر وأسرع في القراءة، ولكني رأيت أنه من الأفضل جمع كل الأفكار في مكان واحد تسهيلًا على الطلبة، ولأن الذي يريد أن يقرأ سيقرأ وإن كانت أطول من هذا. وسأكتب الكثير من الأمور الشخصية كأمثلة توضيحية لمن يعرفونني حتى أثبت صحة كلامي.

اختيار أنسب كلية
باختصار، إليك بعض النصايح ممن هو أكبر منك سنًا بقليل:
1-                        بلاش تختار الكلية على أساس الاستخسار! ما تقولش: «أنا جبت 98% فعايز أدخل طب (أو هندسة أو أيا كانت الكلية) عشان حرام أضيع الدرجات اللي جبتها في المجموع دي». ده ما اسموش كلام يا راجل! ادخل اللي انت عايزه عشان تبقى متميز فيه، مش عشان المجموع.
عندنا في كليتنا، آداب انجليزي عين شمس، دكاترة كانوا م الأوائل ع الجمهورية! متخيل إن حد يطلع الرابع أو الخامس ع الجمهورية ويقرر يدخل كلية الآداب؟ دلوقتي لو حد فكر يعملها ح يلاقي المجتمع كله بيقول عليه مجنون، ومش بعيد أهله يرموه برّة البيت! لكن اللي عملوها من سنين طويلة بقوا دكاترة «متميزين» جدًا في الكلية، عشان هم قرروا يدخلوا اللي هم بيحبوه وعايزين يتفوقوا فيه، مش اللي «الناس» شايفاه مناسب أو اللي مجموعُه يدخلهوله!
2-                        لا مؤاخذة، سيبك من بابا عايز وماما عايزة. إنتي ح تدخلي كلية تقعدي فيها أربع سنين (وفي كليات تانية خمسة) وهم مش ح يبقوا معاكي. إنتي اللي ح تتخرجي وتشتغلي وهم مش ح يبقوا معاكي. إنتي اللي ح تتجوزي وتسيبي البيت وهم مش معاكي. فمعلش يعني مافيش حاجة اسمها «بابا عايزني أدخل الكلية دي»! ابقي خليه هو يقدم فيها تعليم مفتوح، ويدرِس هو وياخد الشهادة!
3-                        كل إنسان مننا ليه طابع وشخصية مختلفة عن التاني، وفيه شخصيات يناسبها شغل معين ما يناسبش شخصيات تانية. الكلام ده كلام علمي مش كلام تخاريف. فيه نظرية بتقول إن البشر عبارة عن 16 نوع من الشخصيات، منها اللي بيعتمد على تفكيره أكتر من مشاعره، ومنها الانطوائي (اللي طاقته بتخلص من التفاعل مع الناس وبيحتاج ينعزل فترة عشان يشحن) والاجتماعي (اللي بيشحن طاقته م الاختلاط والتفاعل مع الناس) إلخ. لما تعمل الاختبار ده، ح يقول لك إيه أنسب وظايف ليك، وده بيبقى فعلًا صح. أنا مثلا عملت الاختبار ده مؤخرًا وطلعت من أنسب الوظايف لشخصيتي التدريس! اكتشفت أنا ليه لما سبت التدريس ورحت اشتغلت في شركة على كمبيوتر ما استحملتش ورجعت تاني للتدريس! والله فاكر إني قلت للمدير هناك: «فين العيال؟ وفين الزعيق والمناهدة والشرح والحاجات دى؟». وصاحبي الانطوائي ما كانش ينفعه التدريس، وطول عمري باتحايل عليه ييجي يشتغل معايا وما كنتش فاهم ليه رافض، أتاري مواجهة الجمهور (في الفصل أو قاعة التدريس) مشكلة للنوع ده من الشخصيات. دلوقتي لو عملت الاختبار ده ممكن يساعدك تختار كليتك، لأنه ح يعرفك إنت بتفكر إزاي وبتحب إيه وإيه المناسب ليك، فممكن ع الأساس ده تختار الكلية اللي تأهلك للوظيفة دي. يا ريت نعمل الاختبار بعد ما نكمل قراية للآخر يا جماعة، ماشي؟ *بصوت حزلقوم*
ده بالانجليزي
وده بالعربي
وممكن لما تطلع لك نتيجة شخصيتك، تدخل عليها ع الموقع ده وتشوف الفيديو بتاعها، ح يقول لك باختصار (أسرع من قراية كل التفاصيل في الموقع بتاع الاختبار) أفضل الوظايف ليك
4-                        لما تحب تسأل عن كلية معينة، ما تعتمدش على صاحب واحد أو اتنين. اسأل معيدين ودكاترة؛ اسأل خريجين؛ اسأل أصحاب كتير، عشان تقدر تكون فكرة صح عن الكلية دى.
5-                        مافيش حاجة اسمها أنا داخلة الـ AUC. عمرك سمعتي واحدة بتقول لك: أنا ناوية أدخل «عين شمس»؟ ح تسألي بتلقائية: «أيوة كلية إيه يعني؟» يبقى الطبيعي إنك تقولي الكلية.
الدرس المستفاد: بلاش أنعرة وخلاص، يعني منظرة! مش بندخل جامعات عشان نتمنظر بالاسم بتاعها؛ أنا في الإم آي يو والبي يو إي والتو تو تو!
6-                        انتشرت في الفترة الأخيرة مقولة «كلنا عارفين إن ماحدش بيشتغل بالشهادة بتاعته، فمش لازم تزعل ع الدرجات والكلية. ادخل أي كلية وخد كورسات واوصل للي انت عايزه بمجهودك». أنا عارف إن ده للأسف صح شوية، بس عندي اقتراح يعني: فيها إيه لما تدخل كلية إنت بتحبها وتشتغل بالشهادة بتاعتك؟ يعني أنا واحد باحب الرسم جدًا وطول ما انا قاعد بافضل ارسم وتطلع اللوحات حلوة، ليه ما ادخلش كلية فنون جميلة مثلا أو تربية فنية؟ واهو أبقى اشتغلت باللي درسته وباحبه.
حد ح يسألني: وهو اللي اتخرج منها ح يشتغل إيه يعني؟ أقول له: لو بيحب الحاجة قوي فعلًا ممكن يتفوق ويبقى معيد في الكلية دي، أو ممكن يشتغل شغل له علاقة بالفن ده، حتى لو يدي كورسات رسم.
حد ح يقول لي: وهو ده ح يجيب فلوس؟ أقول: آه، يبقى حضرتك بتدور على شغل مش على كلية تدرس فيها عشان «تتعلم» وتبقى بتشتغل حاجة بتحبها. ممكن نخلي مكتب التنسيق بقى يفتح مكتب توظيف بالمرّة!
حد ح يقول لي: بابا مش موافق أدخل الكلية دي وبيقول لي أدخل كلية ليها شهادة عليها القيمة وبعدين أكمل كورسات بعيد عن الكلية. أقول لها: هو ده اللي مخلي البلد والتنسيق حالهم صعب كده! الناس بتدخل كليات عشان «الشهادات» مش عشان «تتعلم» حاجة فعلًا تضيف ليها. والله لو باباكي مُصِرّ بقى ع الكليات إياها، اطلعي للنقطة رقم اتنين وشوفي ردي!

نعود إلى ميرنا وسمر. كان الكلام بيني وبين كل منهما وحدها يدور في فكرة «أنا شاطرة في الإنجليزي، يبقى أدخل كلية تانية وخلاص وابقى اقرا أو آخد كورسات انجليزي لو احتجت، ولو اني شاطرة ومش ح احتاج». كانتا تعتقدان أن دراسة «اللغة الإنجليزية وآدابها» في أية كلية، سواء الآداب أو الألسن، مجرد دراسة «لغة» وهو ما كانتا متفوقتين فيه. وبعد أن دخلتا كلية الألسن (قسم إنجليزي!) قالتا لي إن الدراسة «صعبة» وغير ما كانت كل منهما تتوقع على الإطلاق، وهو ما كنت أحاول قوله أثناء النقاشات التي حدثت بيني وبينهما (كل بمفردها) أيام التنسيق. ورغم أنهما دخلتا كلية «قمة» من وجهة نظر المجتمع الذي نعيش فيه، إلا أنني أُفَضِّل كلية الآداب عليها مائة مرة، ومن هنا نبدأ الحديث عن الكلية بشكل عام، ثم قسم اللغة الإنجليزية وآدابها بشكل خاص.

عن كلية الآداب
ينظر معظم الناس إلى كلية الآداب باعتبارها كلية «اللي مش جايبين مجموع» أو «اللي مش عايزين يذاكروا»، وهو خطأ كبير وصورة مغلوطة، ربما نأخذ سنوات عِدَّة كي نغيرها (إن استطعنا أو عشنا). هذه الكلية يا سادة مصنع الثقافة ومنبت التفكير النقدي الحر؛ هذه الكلية أخرجت المفكرين والأدباء والكتاب ومن يُفتَرَض بهم قيادة المجتمع؛ وهذه الكلية تُغيِّر الطالب بها إلى الأفضل بشكلٍ لا يوصف، شريطة أن يريد هو ذلك ويساعد عليه. لا أقول ذلك مبالغةً مِنِّي أو لأنني منها، بل هو الواقع الذي اكتشفته بعد تخرجي بسنوات.
إن أردت أن تدرس التاريخ أو الأدب أو اللغة أو الفن أو المسرح أو الإعلام فانضم إلى كلية الآداب، فبها من الأقسام المتنوعة ما يلبّي طموحاتك ويثري عقلك في شتى المجالات. إعلان حلو، مش كده؟ لكن هذه هي الحقيقة التي ربما لن يصدقها إلا من عاشها، مثلي.
كنت أقول لإحدى الطالبات بالمدرسة منذ يومين إن هناك فرق بين حُبِّ الشيء وهوايته وبين دراسته. هي تحب الموسيقى وتنوي دراسة الهندسة، وقالت إن بإمكانها أخذ «كورسات» في الموسيقى لاحقًا. قلت لها: «بنات قالوا لي السنة اللي فاتت نفس الفكرة دي عن دراسة الإنجليزي، فقلت لهم لأ طبعًا. لما بتدرسي حاجة بتلاقيها ‘علم’ مش مجرد فن أو حاجة سهلة. يعني الناس كانت فاكرانا بنقرا روايات ومسرحيات وخلاص كده الموضوع سهل، لكن احنا بندرس تاريخ أدب ومدارس أدبية ونقدية، وسياسة وعلم نفس وفلسفة...» ابتسمت، فأكملتُ «تخيلي أنا أصلا كنت علمي علوم وما درستش لا فلسفة ولا علم نفس، وبعدين درستهم بالانجليزي! مش سهل خالص. أنا دلوقتي يا منار باذاكر اليومين دول للماجستير وانا مستمتع!». وللحق أقول، المدارس النقدية تجعلك تقرأ كل شيء بشكلٍ جديدٍ ومختلف. ردَّتْ: «عشان انت دخلت حاجة بتحبها! وانا باحب الهندسة!». قلت لها إن دراسة الموسيقى في الكلية ستجعلها ترى عالَمًا جديدًا عليها، ولن ترى الموسيقى مجرد هواية أو شيئًا يمكن تحصيله لاحقًا.
هناك القليل جدًا ممن استطاع الجمع بين دراسة عِلمية عَمَلية (كالطب) ومعرفة الكثير عن الأدب والنقد، مثل الدكتور أحمد خالد توفيق، الذي أراه مُلِمًّا بالكثير عن المدارس النقدية وتاريخ الأدب. أعرف أنه مهما أوتيتُ من علمٍ فلن أضاهيه في الطب، وكذلك هو، مهما أوتيَ من علمٍ فلن يكون متخصصًا مثلي في الأدب والنقد. ولذا، فإن لم تستطع الجمع بين ... دعني أقول نقيضين، فالأولى أن تختار اختيارًا صحيحًا.
لماذا أحاول اجتذاب الطلبة ليدخلوا كليات ليست «هندسة» أو «طب» أو «صيدلة»؟ الرد يأتي في هذه المواقف:
تسأل طنط سهير مريم: دخلتي إيه؟ فتجيب مريم: هندسة. «ما شاء الله»، تجيب طنط سهير.
تسأل طنط سهير مريم: دخلتي إيه؟ فتجيب مريم: طِبّ. «ما شاء الله»، تجيب طنط سهير.
تسأل طنط سهير مريم: دخلتي إيه؟ فتجيب مريم: آداب. «معلش»، تجيب طنط سهير، وربما تقول في سرها «يا عيني».
وكذلك الآباء (الذين يحتاجون إلى تغيير نظرتهم إلى المنظومة التعليمية ككل أكثر من الطلبة أنفسهم) يتفاخرون بدخول أبنائهم وبناتهم كليات الصيدلة والهندسة والطب ولا يتفاخرون بالآداب والحقوق والتجارة. لماذا؟ كلنا نعرف الإجابة، فلا داعي لهذا النقاش.

خريج آداب إنجليزي
أنا أحب الأدب؟ لأني خريج آداب إنجليزي.
أكتب بعربية فصحى سليمة؟ لأني خريج آداب إنجليزي!
أحب الشعر العربي والمسرح والفنون؟ أقدّر الجمال والإبداع والتميز؟ لأني خريج آداب إنجليزي.
غيَّرتني. جعلتني أفضل. أصبحتُ شخصًا مختلفًا. صرتُ أكثر تَقَبُّلًا للآخر. أرَتني العالمَ مِن زاويةٍ أوسع. ومكنتني من التمييز بين الرَّثِّ والثمين.
لو لاحظ أحد الفقرة السابقة، لوجد أنها مكتوبة بشكل فني بسيط. الجملة الأولى كلمة واحدة، والثانية كلمتان، وهكذا إلى نهايتها. وهذا باختصار أحد فوائد الدراسة بقسم اللغة الإنجليزية وآدابها بكلية الآداب. تبدع فتخرج أفضل ما لديك. لا عجب إذن أن يتخرج كثير من المبدعين من قسمنا: عمار الشريعي ومصطفى سعيد ويوسف الشريعي (موسيقى) وسلمى حدّاد (غناء). ربما تتساءلين: ما علاقة دراسة الآداب الإنجليزية بالموسيقى أو الإبداع بشكل عام؟
لازم تبقي عارفة إن احنا مش بندرس أدب انجليزي بس. احنا بندرس أدب انجليزي وأمريكي وأحيانًا أيرلندي؛ يعني تقدري تقولي آداب عالمية باللغة الإنجليزية. وكمان بندرس عربي وفرنساوي أو ألماني، ولاتيني، وتاريخ اللغة وتطورها، ونظريات نقدية، وحضارة (ثقافة العصور المختلفة في أوروبا ومفكريها وكُتَّابها)...إلخ. كل ده بيخليكي عندك حاجة اسمها «تذوق أدبي» أو «تذوق فني»؛ بتبتدي تدوقي الجمال في الحياة حواليكي. وده ح يفيدك بإيه؟ ح يفيدك جامد.. ح تبتدي تعرفي جمال الكلام وازاي تلعبي بيه، وازاي تحللي جملة واحد بيتكلم قدامك وتعرفي إذا كان بيكذب والا لأ، وتقدري تفهمي الأفلام والنهايات المفتوحة وتحللي الشخصيات، إلخ.
لا عجب إذن أن نجد معظم من اهتموا بالدراسة من دفعتي يفكرون بشكل جيد ولا يقبلون الهذيان الذي ينطلق مِن أفواه مَن يطلقون على أنفسهم إعلاميين، بل ولا يخدعهم من يقول «صحيح يا ماسريين»، لأنهم تدربوا على التفكير النقدي وتحليل الخطاب وتحليل الكلام بشكل محايد. تعلمنا جميعًا أهمية الكلمة، وأهمية استخدامها، وأهمية تحليلها.
في مقالتي «إنهم يخدمون الغرب»، تحدثت عن مفاهيم سياسية واستعمارية، وقلت إننا درسناها في كليتنا. دراستنا، إذن، ليست مجرد «حواديت» نقرؤها ونحكيها، بل علوم ونظريات ندرسها ونطبقها على واقعنا المعاصر.
في الأدب ودراسته، بتتعرضي لأعمال أدبية فيها كم كبير من المشاكل وبعض الحلول ليها. ده بيديكي ثراء فكري (حلوة الكلمة مش كده؟) وبيخليكي عندك قدرة كبيرة على حل المشكلات اللي بتواجهك في الحياة. اتعملنا إن الأدب هوّ الحياة. وده حقيقي. الأدب مراية بتعكس اللي بنشوفه، واللي يشوف بلوة غيره (في رواية) بتهون عليه بلوته.
واحد زمان قوي سألني: هو ليه بتقول إن الأدب فيه حلول للمشاكل، مع إننا عندنا الإسلام فيه حل لكل المشاكل؟ قلت له: الأدب مش بيقدم حلول للمشاكل. الأدب بيعرض المشكلة، ولما يعرضها نبدأ نشوف ح نحلها ازاي بقى وبأي طريقة. صاحبي اقتنع، لأن ده حقيقي بالنسبة للأدب.
آخر حاجة عايز اقولها: أنا ما كنتش حابب إن الخواطر/المقالة دي تبان كأنها دعاية لمكان معين أو أشخاص بعينهم أو كده، بس الصراحة ما اقدرش اختم من غير ما اتكلم عن القسم بشكل شخصي.. عن دادة أم تامر اللي مافيش حد ف آداب إنجليزي ما بيحبهاش وبيعتبرها مامته، وبيلجأ لها في أي وقت عشان تساعده ف أي حاجة يحتاجها.. عن كل دكاترتنا اللي بيعاملونا كأنهم أهالينا مش بيتكبروا علينا زي ما بنسمع عن الدكاترة في الكليات التانية. أنا فاكر إني ف سنة أولى رحت لصاحبي عند كلية علوم (كانت أولى صيدلة وقتها بتاخد محاضرات في مدرجات علوم) وشفت الدكتور بيعامله بعجرفة شديدة، وحسيت إن دكاترة الجامعة دول في «برج عاجي» كده بعيد عن الناس العاديين، لكن عندنا الوضع مش كده خالص. من سنة ونص كده علَّقِت واحدة من كلية الهندسة ع الموضوع ده، وقالت لزميلتي: «إنتوا ازاي الدكاترة عندكم بيهزروا معاكوا وبيتعاملوا بشكل طبيعي كده وتلقائي؟». الدكاترة عندنا بيعاملونا بشكل يحترم آدميتنا، بيعاملوا عقولنا، بيحسسونا إننا بشر لينا قيمة، عشان عايزين يخرجوا أجيال بتعرف تفكر وتشغل مخها وتفيد بلدها بجد.
عندنا اللي بياخد درس بيسقط، مش استقصاد، بس عشان الدرس ده معناه إنك حفظت كلام بتاع حد عاملهولك، وما شغلتش مخك ولا تعبت في المعلومة بشكل شخصي، فما ينفعش تتخرج من عندنا كطالب يواجه سوق العمل بالشكل ده.
أعتقد أن هذا كل ما لديّ لأقوله الآن.
ربنا يوفقكم وتختاروا صح، ويا رب نلاقي كده الناس بتقدَّر القسم العظيم في كليتنا ده، ويعرفوا قيمته كويس قوي...
يا ريت الناس تشارك/تعمل شير للكلام ده عشان نوصل لأكبر قدر من الناس...

أحمد عادل

الأحد 12 يوليه – الأربعاء 15 يوليه 2015 م

هناك 73 تعليقًا:

  1. تقريباً انا مريم اللى حضرتك بتتكلم عنها .. شكراً جداً ليك انا كنت محتاجة كلامك جداً

    ردحذف
    الردود
    1. شكرًا ليكي على الرسالة والتشجيع .. ربنا يوفقك يا رب

      حذف
    2. طب بعد ما حضرتك اتخرجت من اداب انجليزي ممكن اعرف اي فرص العمل الي اتوفرتلك بعدها

      حذف
  2. كنت محتاجة أقرا المقال ده قبل ما أقرر انى أدخل الكلية اللى تناسبنى بجد و أقدر أبدع فيها لأن أنا جربت و دخلت كلية لمجرد اسمها و سمعتها ماهتمتش بالمواد و مدى استجابتى و اهتمامى ليها و لا بصيت لمجال شغلها من ناحية هل كان فعلا مناسب ليا و لشخصيتى و مهاراتى و لا لأ و طبعا كانت النتيجة انى مقدرتش أكمل فى الكلية. دلوقتى ابتديت فعلا ابص للكليات عامة بنظرة مختلفة تماما عن نظرة كليات قمة و كليات "مش" قمة و بعد تفكير طويل قررت انى احول للكلية اللى استحوذت على أكبر قدر من الشغف عندى على أمل انى اتميز فى دراستها ومجال عملها. مشكور على المقال الرائع.

    ردحذف
    الردود
    1. قرار رائع .. يا ترى دخلتي كلية آداب والا إيه؟ الفكرة إن الواحد يدخل اللي بيحبه مش اللي الناس شايفاه حلو!

      حذف
  3. أزال المؤلف هذا التعليق.

    ردحذف
    الردود
    1. لماذا حذفت الرسالة؟ كانت جميلة ولم ألحق أن أرد عليها

      حذف

  4. معادلة كلية الهندسة

    لو كنت خريج معهد فني صناعي او خلصت دبلوم
    و حلمك انك تكمل و تدخل كلية الهندسة و مش عارف ايه هي الطريقة اللي تحقق بيها حلمك
    معادلة كلية الهندسة هي الحل تقدر تقدم فيها بالمجلس الاعلي للجامعات
    مع مركز النور هتلاقي كل الاجابات اللي محتاجها عن كلية الهندسة و معادلة كلية الهندسة
    مركز النور بيقدم اقوي محاضرات الشرح و حل جميع الامتحانات السابقة لنأهلك للامتحتنات و النجاح بها بأذن الله
    مع مركز النور هتحقق حلم كلية الهندسة
    لسنا الوحيدين لكننا الافضل

    اتصل بنا 01093189974- 01118585670 – 01220911562

    http://www.equation-college-engineering.com/

    ردحذف
  5. أزال أحد مشرفي المدونة هذا التعليق.

    ردحذف
  6. السلام عليكم انا حضرتك خريجة تربية قسم علم نفس سنة 2011 كان حلمي ادخل القسم ده ف اداب بس للاسف مجموعي في اللغات مسمحش اني ادخله وبالرغم كده انا بحاول بكل الطرق اني ارجع تاني ادرس فيها سواء كان تعليم مفتوح اللى سمعت انه تقريبا اتلغى او انتساب لخريجي المؤهلات العليا اللى وصل لتقريبا 5000 جنية وبرضه محتاج مجموع الثانوية العامة ف اللغات .. انا دايما عندي احساس اني ناقصني حاجة في حياتي والحاجة ديه دراستي للغة ديه في اداب انجليزي .. انا مش عارفة اعمل ايه ..... وانا اسفة عالتطويل

    ردحذف
  7. بجد كلام جميل جدا وكنت محتاجاااه وحببنى اكتر فى الكليه اكتر منا حباها وباتحديد قسم انجليزى بس مازلت عاوزه اعرف هل تربيه احسن من اداب ؟! لانها اكيد طالما اعلى منها فى المجموع يبقى ى حاجه بتميزها

    ردحذف
    الردود
    1. مش فكرة مين أحسن .. تربية بتبقى متخصصة أكتر في التدريس، لكن آداب مجالاتها أوسع شوية. تربية مجموعها أعلى لأن مهنة التدريس واضحة فيها ومنها تقدري تسافري تشتغلي برة أو حتى في مصر بشكل كويس، إنما آداب مالهاش مهنة محددة.. بس طبعًا لو انا اللي باختار ح اختار آداب أكيد، أيا كان القسم

      حذف
  8. انت تكتب الهري دا كلو لانك اكيد بتاخد مرتب اخر الشهر انا من خريجي الادب الانجليزي و اقسم بالله العظيم مالوش قيمه ابدا ولا مستقبل حتى يعني ادرس دروس سيئه جدا و في النهايه عايزني اشتغل معلمه في المدارس العاديه مثلا؟؟؟؟؟؟؟؟؟؟

    ردحذف
  9. طب دلوقتي الكلام حلو وجميل ومحفز لشخص عايز يخش اداب , بس انت ماتكلمتش على مجال الكلية دي ومستقبلها ؟ يعني بردو انا لما اتخرج من قسم انجليزي او اسباني او ايطالي اي قسم لغة عموما هشتغل ايه غير مدرس ؟

    ردحذف
  10. استاذ عادل أنا باذن الله حخش اداب انجليزي ونسبتي كويسة لكن حبي للعربية وآدابها يهزني في أحيان كثيرة –دون تأثير على قراري– طبعا أنا قرأت تاريخ آداب العربية لشوقي ضيف وتفقهت كثير فيها لكن سؤالي هل تدرس قواعد العربية في قسم أدب انجليزي؟ لانه من غير المعقول أن المترجمين عن الإنجليزية (كونه يدرس هناك) للعربية لايعرفون اللغة العربية (النحو والصرف والبلاغة)
    ارجو ردك يا استاذي كلامك جميل جداً

    ردحذف
    الردود
    1. في آداب انجليزي مش بندرس قواعد اللغة العربية بشكل منفصل، لكن بتتاخد واحنا بتدرس ترجمة... فتلاقي الدكتورة تقول لأ دي كذا عشان فاعل مثلا...
      الصراحة مافيش تركيز ع القواعد لكن التركيز الأكتر ع الأدب، ومع ذلك معظم دكاترتنا شاطرين في العربي... م الآخر اللي مهتم بس هو اللي بيكمل ويبقى كويس إنما فيه ناس زي ما دخلت زي ما خرجت...

      حذف
  11. كنت عايزه اعرف ف مجال شغل وتدريس اني احسن اداب اثار حضاره مصريه ولا تربيه انجلش

    ردحذف
    الردود
    1. ايه معلومات عنهم هما اتنين انسب ف وقت حالي

      حذف
    2. أعتقد كتدريس وشغل برة مصر تربية أحسن عشان دي تخصص تدريس، لكن آداب آثار برضه كذا مجال، زي السياحة وتدريس التاريخ مثلا

      حذف
  12. نا مبسوطة جدا انى قريت البوست دا ربنا يكرمك <3 نا ف كلية اداب طنطا قسم لغة انجليزية وحابة القسم جدا ادعيلي ربنا يوفقنى وحابة استغلك بصراحة ههههه نفسى اعرف من حضرتك اسماء كتب او روايات او حتى افلام واغانى تساعدني ف دراستى وتطوير اللغة عندى يعنى ياريت حضرتك لو تقدر تفيدنى باى حاجة عشان حاسة انى تايهة والمصادر كتير وخايفة امشي ف طريق غلط ارجو النصيحة

    ردحذف
    الردود
    1. موقع BBC فيه حاجات ممتازة .. زي البودكاستس (podcasts) ودي بتعتبر مصدر جيد لممارسة الاستماع بالانجليزي في مجالات كتيييير قوي وكل واحدة حسب ميولها .. وطبعًا فيه كمان أخبار وكده ممكن تقريها فتنمي عندك vocabulary كويسة كبداية
      فيه كمان موقع esl-lab.com بيعمل تمارين حلوة للاستماع وتحلي وتعرفي درجاتك
      بالنسبة للروايات، ابدأي بالروايات الحديثة عشان لغتها أسهل كتييييير م الكلاسيكيات.. اقري مثلا The Hunger Games وسلسلة Divergent أو هاري بوتر أو أي رواية لــ Nicholas Sparks

      حذف
  13. وهل من العدل أن تقوم كلية الآداب، قسم اللغة الإنجليزية بعمل اختبارات للقبول بالكلية، وقبول ٥٠ طالب فقط!! ومن أراد الالتحاق من حاملي الشهادات العليا عليه اجتياز اختبارات الالتحاق أولا وأن يحظى بأن يكون ضمن الخمسين طالبا، وأن يدفع مصروفات تقدٓر بخمسة آلاف جنيه للعام الواحد! كل ذلك لأنه أراد أن يستزيد عِلما أو للأسف لم يُصر من البداية على الالتحاق بالكلية التي أرادها وسمِع لقول المحيطين. وهل من حل؟

    ردحذف
    الردود
    1. 50 طالباً فقط!،5 آلاف!، كتير جدا

      حذف
    2. أكيد مش عدل.. بس أعتقد هم بيعملوا كده عشان زمان كنا بنبقى 500 طالب مثلا وناس كتير بتسقط وناس مش بتحضر وبيبقى التحصيل الدراسي مش قوي، وكمان الصراحة درجة الثانوية العامة مش مقياس خالص لأن ممكن يكون فيه غش أو حفظ أو غيره وغيره، فطبعًا بيبقوا عايزين ياخدوا أحسن ناس عشان الاستفادة القصوى من المناهج وكده يعني..

      حذف
    3. احنا ف كلية الاداب قسم اللغه الانجليزيه حوالي1000طالب ازاي50طالب دي اول مره اعرفها احنا السنه اللي فاتت كنا حوالي1000

      حذف
  14. السلام عليكم، أنا في الفرقة الثالثة كلية تجارة، و لا أستطيع أن استمر فيها وأريد أن أدرس شئ آخر و لفت انتباهي اداب قسم انجليزي، ماذا تنصحوني أن أفعل، هل أترك 3 سنين من عمري وأن أدرس ما يحلو لي؟

    ردحذف
  15. كنت عايز اسأل سؤال ينفع أطلع مترجم من كلية اداب انجليزي ؟

    ردحذف
    الردود
    1. أعتقد حرام تضيع تلات سنين وتبدأ من جديد .. ينفع آه تطلع مترجم طبعًا بس من ألسن بتبقى أقوى بكتير من آداب .. رأيي انك تكمل في تجارة وتاخد كورسات رغم انها ح تبقى غير الدراسة في آداب خالص.. بس لو مش قادر خالص لازم تشوف الشروط بتاعة القسم قبل ما تسيب كليتك، عشان بقالهم فترة مش بيقبلوا المحولين والمؤهلات العليا وكده

      حذف
  16. هل يمكنني ان احضر بعد تخرجي من كلية الاداب لغة انجليزية الي مجال آخر

    ردحذف
  17. وما هي المجالات التي يتسنى لطالب الاداب لغة انجليزية عن يحضر بها .

    ردحذف
  18. وما هي المجالات التي يتسنى لطالب الاداب لغة انجليزية عن يحضر بها .

    ردحذف
  19. اشتغل اى بعد متخرج؟
    وانت شغال ايه؟

    ردحذف
    الردود
    1. وظايف كتيرة زي ما انا كاتب، بداية من التدريس والترجمة لحد البنوك والسياحة

      أنا شغال مدررس

      حذف
  20. اداب قسم ترجمة فورية أفضل أم اداب انجليزي ؟

    ردحذف
    الردود
    1. ما عنديش فكرة عن ترجمة فورية بس آداب انجليزي عامة شاملة اكتر

      حذف
  21. كلام جميل ومحفز بس اكيد الكليه محتاجه كورسات كتير والوقت قصير 😔

    ردحذف
    الردود
    1. مش محتاجة كورسات كتير لأن الدراسة فيها مليانة بالفعل

      حذف
  22. معرفتش برضه أما اخشها هتخرج معايا مؤهل اي او اشتغل ف اي..انا مرضيتش افكر ف تربيه عشان مش بحب التدريس ومشعارف أقرر اي ومعدش وقت

    ردحذف
    الردود
    1. مجالات آداب انجليزي أكتر من تربية .. تربية بيبقى مجالها بشكل أساسي التدريس إنما أعرف ناس آداب انجليزي بيشتغلوا في السياحة أو البنوك أو الترجمة أو التدريس الخ .. كلمة "انجليزي" بتفتح مجالات كتير

      حذف
  23. انا ان شاء الله هادخل اداب انجليزي هل يوجد مجالات عمل اخري غير التدريس

    ردحذف
    الردود
    1. فيه مجالات آه، زي السياحة أو البنوك أو الترجمة أو حتى في الصحافة والإعلام .. كلمة "انجليزي" بتفتح مجالات كتير

      حذف
  24. أزال المؤلف هذا التعليق.

    ردحذف
  25. انا جايبه ف الانجلش47 الحق قسم الانجلش ف اداب!!؟

    ردحذف
  26. حاجه كمان انا جايبه91%مجموع كلي ف الثانويه،، وكل م اكلم حد و اقول اني هدخل اداب يستغرب و يقولي م تدخلي تربيه او خاص و انا مش حابه تربيه تاني مشكله بيجي ف بالي اني كدا اتساويت مع اللي جاب ف 80،، انا اللي مخليني ادخلها اشتغل ف الترجمه ف عايزه اعرف كمان ممكن اشتغل فيها من امتي، ، اسفه اني طولت بس ياريت ترد عليا بسرعه انا المفروض اكتب رغباتي بكرا و لقيت مقالك بالصدفه و كأنه رساله من ربنا ، وشكرا ليك جدا

    ردحذف
    الردود
    1. آسف بجد كنت مشغول جدًا فما شفتش ردك ده.. ما اعتقدش 47 ممكن تلحق آداب انجليزي.. آداب عامة بتفضل للمرحلة التالتة بس المشكلة إن فيه أقسام بتتملي ومش بيقبلوا ناس مرحلة تالتة زي قسم انجليزي وإعلام وعبري وكده.. بالنسبة للترجمة آداب مش بتبقى قوية قوي في الترجمة زي ألسن طبعا..
      مافيش حاجة اسمها اتساويتي مع اللي جايبين 80% لأنك لو داخلاها وانتي حابة تدخليها ح تبقي شاطرة فيها أكتر بكتير م اللي جايبين 80 والعبرة عامة بإنك تذاكري كويس فيها وتتفوقي ع الكل..
      فكري في أقسام تانية كتير زي إرشاد سياحي وإعلام

      حذف
  27. انا جايبة في الانجليش 50 من 50 وبحب اللغة جدا وجابة اداب انجليش جدا .بس خايفة ملحقش عشان بيقولوا انها بتعتمد علي مجموع كل اللغات انا مقفلة الفرنساوي والانجليش وناقصة في العربي 11 درجة ومش عارفة اجيب ولا درجة فيهم ..ارجو الرد بسرعة
    وشكرا مقدما لزوقك وكلامك الرائع والتحفيز والطاقة الإيجابية دي كلها

    ردحذف
    الردود
    1. لأ مجموع التلات لغات ده بيبقى في أقسام تانية زي آداب إعلام مثلا .. إنما الانجليزي بيبقى درجة الانجليزي (وانتي ما شاء الله مقفلة الامتحان) وبيعملوا admission test وبياخدوا أعلى درجات فيه.. حاولي تذاكري شوية قبل الامتحان ده وربنا يوفقك :)

      حذف
  28. حضرتك صاحب موهبة بيانية كبيرة وأسأل الله أن يزيدك ، لكن اعذرني فظروفي هي التي دفعتني لأسأل سؤالا مثل هذا ، هل الدراسة في هذه الكلية صعبة ؟؟؟؟

    ردحذف
    الردود
    1. آمين يا رب..
      السؤال عادي طبعا.. الدراسة صعبة أو لأ ده موضوع نسبي، لكن في العموم هي مش سهلة خالص.. زي ما مكتوب، بتدرس حاجات كتير وبتبقى مضطر تقرا روايات بكميات كبيرة والروايات دي مكتوبة من اكتر من 200 سنه مثلا فتلاقي الانجليزي بتاعها صعب شوية.. ده غير مسرحيات شيكسبير اللي بتحتاج ترجمة كأنك بتقرا شعر جاهلي كده..
      لو انت حابب الجو ده خش وربنا معاك، خصوصًا إن فيه مواقع بتساعى على قراية المسرحيات دي وكتب بتساعد لكن محتاجة مجهود منك.. إنما لو انت داخل تتعلم انجليزي كأنها كورسات يبقى بلاش لأن الدراسة صعبة بالنسبة للفكرة دي :)

      حذف
  29. انا طالبه فى كلية الآداب بجامعة المنصورة قسم انجلش وداخله تانيه ممكن تكتب المواقع إلى بتساعد على قراءه المسرحيات ��لو سمحت

    ردحذف
    الردود
    1. https://www.sparknotes.com/

      https://www.gradesaver.com/

      حذف
  30. حضرتك انا جايب 46 درجه فى الغه الانجليزيه وشروطها 46.5درجه هل من الممكن اقبل ام لا

    ردحذف
    الردود
    1. ما اعتقدش إلا لو العدد اللي جايب ٤٦.٥ أقل م المطلوب فممكن ينزلوا نص درجة ساعتها لكن ده احتمال ضعيف

      حذف
  31. انا ف كليه اداب انجليزي ونفسي اتفوق فيها وعايزه خطوات اتبعها عشان اتفوق فيها

    ردحذف
    الردود
    1. بالنسبة للخطوات، رقم واحد واتنين وعشرة هو الحضوووور.. لازم حضور المحاضرات وماحدش ياخد دروس
      رقم اتنين القراية الكتير، يعني المسرحية اللي تاخديها تقريها مش مجرد ملخصات، والروايات تقريها وتقري مقالات عنها..
      رقم تلاتة التركيز مع الدكاتره في نصايحهم وتيجي على نفسك وتذاكري كأنها كيميا عشان التفوق محتاج مجهود... ربنا معاكي

      حذف
  32. لو سمحت انا في تجارة انجلش ودخلت الكلية لان مجال شغلها بنوك وشركات افضل من اداب * دا على حسب ما سمعت* وهكذا وطبعا اني اشتغل بعد الكليه دي حاجه مهمه بالنسبه لي عشان كدا اخترت تجارة انجلش. لكن مواد كليتي صعبه ومش شغفي اساسا انا كل اهتمامي في الانجليزي ودراسته واني اعرف عنه اكثر واكون عندي طلاقه ف اللغه دي اهم حاجه بالنسبه لي. دلوقتي انا المفروض احول لاداب ولا مش هتنفعني في اللي انا عيزه ؟ و راي حضرتك في مجال شغل تجارة ومجال شغل اداب. مجموعي 89.5% وانا كنت ادبي و مجموعي في الانجلش 47.5/50 و مجموعي في العربي 75/80 ومجموعي في الأسباني 40/40 . وشروط القبول لاداب قسم انجلش ف جامعه حلوان ان يكون مجموع الانجلش 47 هل ممكن اقبل ؟ ارجو الرد من حضرتك. وشكرا على المقال الرائع جدا :)

    ردحذف
  33. شكرًا ع السؤال..
    أنا الصراحة مش عارف شروط التحويل دلوقتي وهل التحويل متاح أصلًا والّا قفل خلاص.. بالنسبة لدراسة الإنجليزي والتقوية في اللغة، كلية آداب عايزة واحد أصلا كويس وبتساعد بعد كده في اللغة بس مش زي الكورسات.. يعني بتلاقي نفسك اتحسنت مع الوقت بشكل تدريجي..
    أهم حاجة إن يكون شغفك في دراستك، يعني لو مش حابب تجارة ح يبقى صعب قوي.. لكن شغلها حلو طبعًا.. فانا عارف ان الاختيار صعب بالنسبة لك.. شوف لو فيه مجال للتحويل لآداب ومش ح يكون فاتك كتير اتكل على الله.. لكن الخوف كله إنك تحول وتلاقي نفسك مش ملاحق ومش متابع..
    لو تعرف حد في آداب إنجليزي حلوان كلمه واسأله :)
    ربنا معاك

    ردحذف
  34. لو سمحت انا خريج ثانويه عامه ٢٠١٧ مجموعي كان 91 % دخلت معهد فني صحي واتخرجت بدبلوم فوق متوسط بس حاليا انا نفسي اكمل كلية اداب انجليزي هل ينفع اكمل ولا لأ ولو ينفع اي الشروط

    ردحذف
    الردود
    1. زمان كان فيه انتساب مؤهلات عليا في قسم إنجليزي لكن لغوها بقالهم كام سنة.. ممكن بقى تعليم مفتوح لكن مش متأكد شغال برضه والا لأ.. إنما الدراسة العادية أربع سنين فدي أنا متأكد انهم مش بيقبلوا انتساب حملة مؤهلات دلوقتي :(

      حذف
  35. يعني ينفع اقدم بشهادة الثانويه العامه(٢٠١٧) علشان ادخل الكليه مفيش مشاكل لكن لو قدمت بالمؤهل احتمال مقبلش

    ردحذف
  36. بالمؤهل ما بقاش ينفع فعلا، بس مش عارف بشهادة الثانوية العامة القديمة ينفع برضه والا لأ..

    ردحذف
  37. السلام عليكم ، أنا جايبة ف الإنجلش 45 ممكن الحق آداب انجليزي ولا لا ! وحضرتك خريج جامعة ايه

    ردحذف
    الردود
    1. وعليكم السلام، ما اعتقدش إن 45 ممكن تدخل قسم انجليزى
      أنا خريج عين شمس

      حذف
  38. السلام عليكم ورحمة الله وبركاته
    أنا واحدة في تربية نوعية قسم الانجليزي سنة أولى. بس أنا مش مرتاحة في الكلية لأني بأخذ مواد تربوية أكثر من اللغة، وكمان كنت علمي علوم. ولكن أنا شخص لا يحب القراءة بس بقالي فترة كدا افكر إني أحول الأداب انجليزي انا مترددة خدا ومش عارفة اعمل ايه؟
    ممكن مساعده لو سمحت

    ردحذف
    الردود
    1. وعليكم السلام ورحمة الله وبركاته،
      كلية الآداب مش بندرس فيها لغة بشكل كبير.. التركيز أكتر ع الأدب وتاريخ الأدب وكده.. والصراحة لازم تكونى بتحبى القراية لأن كمية الحاجات اللى ح تقريها المفروض كتير يعنى..
      كمجال شغل (خصوصًا برة مصر) شهادة التربية أحسن كتير..

      حذف
  39. بعد اذنك انا جالي زراعه الزقازيق قسم هندسه زراعيه و عايزه احول اداب انجليزي انا جايبه ٤٧.٥ ف الانجليزي.. حضرتك تنصحني ب اي من حيث الدراسه و الشغل ارجو الرد

    ردحذف
  40. لو سمحت انا في اداب انجلش وعاوزه اشتغل في الترجمة بعد التخرج ف لما اتقبل المفروض اتقبل بتقدير ايه حد أدنى ؟ ولا القبول في الشغل ده بيعتمد على الكورسات

    ردحذف
  41. مقال رائع :)

    يوجد فرص عمل لخريجي اداب انجليزي ب الاسكندرية: خريجات تربية او اداب انجلش

    ردحذف